Pinaagi sa gindihon nga resolution sa pagpanguna ni SB Member Ronald Marte hay tuyo it LGU Kalibo nga makasueod ro Kalibo Sto. Nino Ati-atihan Festival paagi sa paghana nga maeampasan ro numero it presente nga kaabuon it drums o drummers nga nagpatik sa sangka selebrasyon.
Plano sigon nanda nga makaron nga Opening Salvo hay paga-obrahon ro paghana pero naging masako ro gobyerno bangud sa maabo nga aktibidad kapareho ku Tourism Month Celebration.
Ginpasiguro man ni SB Marte nga padayon ro pagplano, pagtuon ag pagpreparar sa nasambit nga record attempt.
Naistoryahan pa sigon it Sangguniang Bayan it Kalibo ro parte sa pinal nga schedule kung hin’uno himuon ro nasambit nga paghana pero sa makaron hay ginatueotan-aw nga basi nga sa ikaywang domingo it Enero sa masunod nga dag-on.
Base man sa istorya nanday SB Marte ag SB Ketchie Luces nga abo man ro mga grupo nga gusto magpartisipar sa nasambit nga plano.
Nasayuran nga may una eamang nga kueang-kueang nga 500 nga drummers ag instrumento ukon manugpatik ro gusto nga eampasan it LGU Kalibo angot sa pagpakigbahin sa Guiness Book of World Records.
Samtang, kampante man si SB Marte nga bastante eun sigon ro numero it mga partisipante makaron nga dag-on para maeampasan ro dating record nga 500.
Madumduman nga nakataeana ro highlight it Opening Salvo sa Oktubre 7 kung siin mga maabong guests ro maga’abot ag ginaeauman nga maga-umpisa man ro pagpraktis ag pagsadsad it mga grupo.
