MALAY, Aklan—Gin-insister ni Malay Mayor Frolibar Bautista nga owa it ginpataasan nga baeayran sa isla it Boracay ag saea nga impormasyon ro nabo-oe ni Tourism Secretary Christina Garcia-Frasco.
Suno kay Bautista, sa sueod it pilang dag-on hay owa nagabag-o ro baeayran sa pagsueod sa pamosong isla it Boracay umpisa ko 2022 ag owa man sanda it nabaton nga reklamo.
Nauna eon nga ginpahayag ni Frasco nga nagakabaeaka ro mga stakeholder sa mataas nga baeayran sa pagsueod sa pinakasikat nga beach destination sa nasyon rason nga owa nanda naabot ro target kara nga 2.4 million tourist arrivals ko 2024.
Antes nga makasueod sa isla it Boracay, ro mga turista hay kinahangean nga magbayad it terminal fee ag environmental fee sa Caticlan Jetty Port sa mainland Malay, mag-eowas pa sa pamasahe sa baroto.
Umpisa ko Setyembre 2022, ro mga domestic ag foreign tourist hay nagabayad it P150 terminal fee antes nga magsueod.
Ro environmental fee hay P150 para sa mga domestic nga turista ag P300 para sa mga dumueuong nga turista.
Dugang pa ni mayor Bautista nga ro mga nasambit nga baeayran hay masyadong importante agud nga mapabilin it local government unit ro mga operasyon kapareho it pag-maintain it mga pantalan it lokal nga gobyerno it Aklan.
Ro environmental fee hay nagatau it daean sa LGU Malay nga maghakot it mga basurang gin-aywan it mga turista, trabahador, ag residente sa resort-island.
Sa makaron hay naging masoehay eon ro pagsueod sa isla ag indi eon kinahangean nga magpila it mabuhay sa nagkaeain-eain nga windows para sa mga baeayran sa Caticlan jetty port kapareho it boat fee, terminal fee, ag environmental fee matapos nga ilunsar ro Boracay iPass, sangka centralized online payment system ko nagtaliwan nga Disyembre.
Sa makaron hay may pilang indibidwal ro nagareklamo bangud sa gina alegar nga dugang nga bayad kon nagabayad it iPass pinaagi sa GCash, PayMaya, 7-Eleven, ukon online bank transfers.
