KALIBO, Aklan—Uman nga nagpadumdum ro lokal nga gobyerno it Nabas sa anang mga residente nga indi anay maging kampante maskin pa nga amat-amat eon nga naganaba ro kaso it COVID-19 sa bilog nga probinsiya it Aklan.
Raya ro ginpahayag ni Nabas mayor James Solanoy kasunod it uman nga pagbalik sa aklan sa General Community Quarantine ukon GCQ umpisa sa setyembre 8 hasta 30 it makaron nga dag-on.
Nasayuran nga ko nagtaliwan nga mga dinomingo hay padayun ro pagnaba it numero it aktibong kaso it virus rason nga ginbutang sa pinakamanaba nga klasipikasyon ro quarantine status it probinsiya.
Naging epektibo sigon ro ginpatuman nga Modified Enhanced Community Quarantine para mapanaba ro aktibong kaso.
Gindugang pa ni mayor Solanoy nga bakunado man ukon bukon , dapat nga makaangkon it disiplina sa kaugalingon ag magsunod sa mga ginaplastar nga health protocols agud nga malikawan nga tamaan it COVID-19.
Sa idaeum it GCQ, pagaboe-on eon ro liquor ban, pagadugangan ro numero it mga pumueuyu nga pwedeng makasueod sa banwa it kalibo kada banwa nga halin sa dating 15 hay paga-obrahon nga 50, mapaeawig ro operasyon it mga establisimento komersiyal hasta alas-7 it gabi-i, pagapasugtan eon ro mga barber shops ag mga parlors , dine-in sa mga kaean-an, pagaduea-on eon ro quarantine pass sa mga barangay ag iba pa.
