BALITANG Espesyal — May sangka libro nga ginsueat it sangka waeong dag-on nga ungang eaeaki nga makit-an eamang sa Ada Community Library sa Idaho, USA.
Sa kaabuon it gustong maghueam it libro, nag abot eon sa 135 nga katawo ro una sa waiting list kara!
Suno sa mga ginikanan it unga, nag-aku ro andang unga nga si Dillon nga nag obra imaw it libro ag sekreto nga gin-aywan sa sambilog sa mga bookshelf it Ada Community Library agud nga mabasa it ibang tawo.
Libangan eon ni Dillon nga mag obra it mga komiks nga may 5 hasta 10 nga pahina rason nga nagdayaw ro anang mga ginikanan kat makasueat imaw it libro nga may 88 pahina.
May titulo ro libro ni Dillon nga “The Adventures of Dillon Helbig’s Crismis”.
Raya hay angot sa anang Christmas adventure ag time travel sa pinakaunang Thanksgiving.
Bangud nga gustong mabasa it ina ni Dillon ro libro, gintawagan nana ro library ag nalipay imaw kat masayuran nga nagustuhan it mga librarian idtu ro obra it anang unga .
Na-impress ro mga librarian nga nakabasa sa libro ni Dillon rason nga imbis nga ibutang nanda raya sa “Lost and Found”, nagdesisyon sanda nga i-eakip raya sa catalog it library.
Kat magkalhit ro balita sa andang lugar angot sa libro ni Dillon, maabu ro gustong makabasa it libro.
Bangud sa interes it mga tawo nga mabasa ro libro ni Dillon, maabu nga publisher eon ro naghinyu sa library ag sa mga ginikanan it unga para i-publish raya .
Sa makaron, may bag-ong librong ginsueat si Dillon angot sa aparador nga nagakaon it jacket.
