KALIBO, Aklan—Ginreklamo it sangka lider it progresibong grupo sa probinsiya it Aklan si Col. Malan Mendoza, tagapaghambae it 31st brigade it Philippine Army bangud sa gina-alegar nga paggamit sa andang litrato nga daywa agud nga engganyuhon ro ibang mga miyembro nga maghalin eon sa andang grupong KADAMAY-Aklan.
Suno kay Nenita Tugna nga sekreto sanda nga gin-piktyuran samtang magkaiping nga nagapungko ag nakikipag-istorya kay Col. Mendoza sa ginpatigayon nga distribution it food packs sa mga benepisyaryo it housing project sa Brgy. Briones, Kalibo kadungan sa ginpatawag nga general assembly ni Kalibo mayor Juris Sucro kun sa siin imbitado ro Philippine Army ag Kalibo PNP.
Ginapakalhit sigon ni Col. Mendoza sa mga miyembro it nasambit nga people’s organization nga gintalikdan eon ni tugna ro andang grupo ag nakikipag-bueuligan eon kanda.
Hugut nga ginpamalibaran ni tugna nga nakipag-alyansa imaw kay Col. Mendoza.
Ro nasambit nga tikang suno kana hay nagapataeang eamang sa andang grupo.
Samtang, gindugang pa ni tugna nga padayun makaron ro imbestigasyon it grupo ni Mendoza sa C. Laserna St. angot sa gina-alegar nga recruitment it new peoples army ukon npa sa lugar apang owa man sanda it nabo-oe nga impormasyon.
