KALIBO, Aklan—Nagpaandam ro lokal nga gobyerno it Malay nga igapasarado ro mga establisyemento, sari-sari store, karinderya ag maabong iba pa kon inde ro mga raya maka-renew it andang business permit.
Suno kay Malay Mayor Frolibar Bautista, hasta sa Hunyo 30 ro gintaeana nga deadline para sa mga business owners nga magsettle it andang dokumento sa munisipyo.
Ginpadumdom it alkalde nga ro buwis ro lifeblood it gobyerno agud nga mabuhi ro sangka banwa rason nga may obligasyon ro mga negosyante nga mag-asikaso sa andang mga dokumento para masettle ro andang baeayran.
Magapatigayon it inspeksyon ro lokal nga gobyerno sa tanan nga mga negosyo ag kon mausisaan nga uwa ro mga raya nakabuoe it business permit ukon uwa naka-renew sa andang dokumento hay gilayon sanda nga igapasarado.
Ginpahayag dugang it alkalde nga unfair sa ibang negosyante nga nagatinguha nga makumpleto ro andang dokumento agud nga maging legal ro andang negosyo rason nga kinahang-ean nga magsunod ro tanan sa proseso ag mag-angkon it nagakaigong dokumento para sa tayuyon nga pag-negosyo sa nasambit nga banwa.
