MAKATO, Aklan — Sangka 73-anyos nga lola ro natusta it buhi matapos masunog ro andang baeay bandang alas-8:30 gabi-i it Biyernes sa Sitio Lawaan, Brgy. Tugas, Makato.
Nakilaea ro namatay nga si Purisima Dolores ag residente it nasambit nga lugar.
Suno kay Evelyn Dolores, igmanghud it biktima nga samtang nagatan-aw it telebisyon sa andang baraka, mga 15 metros eamang ro kaeayuon sa andang baeay hay nabatian nana ro pagtawag it andang kaeapitbaeay angot sa nagakatabu nga sunog.
Insigida sigon sanda nga nagpangayo it bulig, apang pila eamang ro nagpaeapit bangud nga kaabuan sa andang kaeapitbaeay hay nagatan-aw it basketball.
Rumesponde sa lugar ro mga katapo it Bureau of Fire Protection (BFP)-Makato apang pag-abot nanda hay mabahoe eon ro kaeayo maskin nga himo ro baeay sa mixed materials.
Ginpahayag dugang nga owa eon nanda nahimo nga maeowas ro anang magueang bangud nga nagkalhit eon ro kaeayo sa sueod it baeay.
Dugang pa nga bed-ridden eon raya bangud nga paralisado ro katunga it anang eawas .
Maskin sigon imaw hay nag-angkon it 1st degree burn sa anang abaga matapos nga naghana nga tabangan ro biktima.
Nagbuhay it haeos sang oras ro sunog ag kat gindeklara ro fire out bandang alas-9:15 it gabi-i hay nakita ro sunog nga bangkay it lola.
Suno pa kay Evelyn nga antes nga natabu ro sunog hay nagpangayo it katol ro biktima nga ginapatihan nga posibleng napabay-an ag naging rason it sunog.
Owa it anuman nga nasalbar nga gamit ro pamilya.
Kapin sa P150,000 ro ginaboeobanta nga danyos sa natabu nga insidente.
Sa makaron hay nagapadayun pa ro imbestigasyon it BFP-Makato sa nasambit nga insidente.
