KALIBO, Aklan — Gina-usoy makaron it pulisya ro sangka 65-anyos nga lola nga ginapatihan nga miyembro it budol-budol gang nga nagpangbiktima it mga negosyante sa banwa it Kalibo ag Numancia sa Aklan.
Ginkilaea ni P/Staff Sgt. Felizardo Navarra, Jr. it Numancia Police Station ro suspek nga si Felomina Punzalan Fuentes, residente it Brgy. Poblacion, Tangalan, Aklan.
Haeos P300,000 ro nabo-oe it suspek sa pagpangbudol kara sa nagkaeain-eain nga mga negosyante gamit ro talbog nga tseke.
Ginasugid nga nagbakae it 35 nga sako it bugas nga nagabalor it masobra sa P68,000; 700 tray it itlog nga naga-abot sa P118,000; mga electrical supply sa sangka hardware nga kapin sa P80,000; food supplement nga nag-abot sa P62,000 ag nagkaeain-eain nga frozen foods nga nagabalor it P25,000.
Mag-eowas kara, nagpanaw ro grupo nga owa it nag-ea-ong sa ginrentahang warehouse nga owa nakabayad.
Uman nga ginpadumdum it mga otoridad sa mga negosyante nga likawan nga makipag-transaksyon sa mga bukon it kakilaea eabi pa kun ro gamit nanda hay tseke.
