KALIBO, Aklan—Nagpaandam ro Land Transportation Office ukon LTO sa mga driver nga nagamaneho nga sa una impluwensiya it aeak.
Suno kay Engr. Marlon Velez, hepe it LTO-Aklan nga limang ka mga driver ro andang pinaka-ulihing napasakaan it kaso bangud sa hugut nga pagpatuman it Anti- Drugged and Drunk Law.
Sigurado sigon nga maboe-an it lisensya ag makasuhan ro mga nagamaneho it hilong.
Nasayuran nga haeos ap-at nga domingo eon nga nagapatigayon it random checkpoint ro taeatapan kaibahan ro Aklan Police Provincial Office ukon APPO gamit ro alcohol breath analyzer.
Raya hay matapos mataeupangdan nga kaeabanan nga mga hilong nga drivers ro ginahalinan it aksidente sa karsadahon kon sa siin maka-alarma ro nagatinaas nga numero ko nagtaliwan nga mga binuean.
Gindugang pa ni Engr. Velez nga bukon eamang it banwa it kalibo ro andang target kundi maskin ro iba pang banwa sa Aklan.
Pitong personnel it APPO ro gin-augment sa LTO para sa pagpatigayon it nasambit nga operasyon.
Kaeabanan suno nga kana nga nakakahimo it “human error” ro hilong nga driver kapareho it overspeeding ukon reckless driving, bad overtaking ag bad turning nga nagiging rason it aksidente.
