KALIBO, Aklan—Makabig nga destructive ukon makahaealit ro tumama nga 7.3 magnitude nga linog sa pilang parte it Luzon.
Raya ro ginpahayag ni Jo Arlo Sabar it Philippine Institute of Volcanology and Seismology ukon Phivolcs-Aklan.
Suno kana nga bandang alas-8:43 kaina it agahon hay natumod it andang ahensiya ro epicenter it linog sa Lagangilang, Abra, nga may “tectonic” nga origin.// Intensity IV ukon “moderately strong” ro nabatyagan sigon nga linog sa Quezon City.
Maskin suno kana nga halin sa norte ro origin it linog, nabatyagan man raya sa nagkaeain-eain nga parte it Luzon hasta sa National Capital Region.
Kaeabanan suno kana sa mga nahalitan hay ro mga old buildings eabi eon ro mga lumang simbahan nga owa it kabilya.
Naka-experiensiya eon man suno kana it magnitude 7.1 nga linog ro aklan ko June 14, 1990 kun sa siin ro grabeg nahalitan hay ro banwa it Libacao ag Culasi, Antique nga natumod nga epicenter it pag-uyog.
Prone man sigon ro probinsiya sa linog bangud sa west panay faultline nga sambilog sa andang gina-monitor.
Sa pihak nga parte, uman nga ginpadumdum ni Sabar ro publiko angot sa importansiya it earthquake drill ag pagsunod sa building code of the Philippines.
Dapat suno kana nga seryosohon ro mga ginapatigayon nga earthquake drill agud nga eubus nga masanay ro mga tawo sa mga dapat nga obrahon ag malikawan ro pagpanic.
