KALIBO, Aklan—Positibo ro Malay Municipal Tourism Office nga maga-abot pa sa 2 milyon ro tourist arrival hasta nga matapos ro makaron nga 2023 sa Isla it Boracay.
Ginpahayag ni Malay Municipal Tourism Officer Felix Delos Santos nga naabot eon nanda ro target nga 1.8 milyon makaron nga dag-on.
Umpisa suno kana it Enero 1 hasta Nobyembre 7 hay nag-abot eon sa 1,825,758 ro andang nailistang tourists arrival.
Sa nasambit nga numero, 357,066 kara hay mga foreign tourists samtang 1,433,024 mat’a ro local tourists ag 35,668 ro mga Overseas Filipino Workers ukon OFWs.
Raya hay mas mataas sa nailistang arrivals ko 2022 nga nag abot eamang sa 1,759,592.
Dugang pa ni Delos Santos nga nagapasaeamat sanda bangud nga amat amat eon nga nagabalik ro dating sigla it turismo sa Boracay halin sa naging epekto it COVID-19 pandemic kun sa siin kaibahan sa mga nagabalik hay ro mga foreign toursist nga ginapangunahan it mga Koreano, Taiwanese, Americans ag mga taga-Europe.
Sa pihak nga parte, ginklaru ni Delos Santos nga bukon it kaibahan sa andang tourist arrivals ro mga turistang sakay it mga nagadungka nga cruise ship sa Boracay.
Raya hay bangud nga ginakabig sigon sanda nga mga ekskursiyunista bangud nga haeos sang oras eamang ro andang pagtinir kumpara sa mga turista nga nagabuhay it haeos sang adlaw ukon masobra pa sa Boracay ag may accomodation.
Ginaeauman nga 3 hasta 5 cruise pa ro ginaeauman nga magadungka sa isla hasta nga makaron ro 2023.
