KALIBO, Aklan—Nakalista ro Malay Tourism Office it kapin sa 310 nga mga foreign tourist nga nagsueod sa isla it Boracay umpisa Pebrero 12 hasta 25, 2022.
Suno kay Malay Tourism Office Felix Delos Santos, kaabuan sa mga nag-abot nga dumueo-o hay halin sa Estados Unidos, United Kingdom, Germany ag maabu nga iba pa.
Mabahoe sigon nga bulig ro paghaeuga it gobyerno sa mga ginapatuman nga restrictions kung siin bumuhos man ro numero it domestic tourists halin sa National Capital Region.
Mag-eowas kara, nakabulig man ro uman nga pagbukas it gobyerno sa border it nasyon para sa international travelers halin sa visa-free countries.
Nagaeaum si Delos Santos nga magpadayun ro kapagsik it turismo sa Boracay agud nga amat-amat nga makabangon halin sa maeapnagon nga epekto it pandemya.
Sa makaron, balik operasyon eon ro mga seasports ag aqua sports activities apang strikto gihapon nga ginasunod ro 50 hasta 70% nga capacity.
Ginaeauman nga maga-abot pa it limang dag-on antes eubusang makabangon ro isla halin sa pagkalugi.
Sa pihak nga parte, ginpasugtan eon man it lokal nga gobyerno ro pag-side trip it mga turista sa lugar pamasyaran sa mainland Malay.
Pila pa sa ginapabugae nanda nga atraksyon hay ro Nabaoy River, Malay Ecological Park ag mga manami nga pamasyaran sa Brgy. Naasug.
