KALIBO, Aklan—Suportado it Malay Tourism Office ro bag-ong slogan it Department of Tourism (DOT) nga “Love the Philippines” nga ginlunsar kadungan sa 50th anniversary kara ko Martes.
Suno kay Felix delos Santos, chief tourism officer it Malay Tourism Office nga sa kamatuoran hay may una eon sanda nga slogan nga “Love Boracay” nga ginlunsar ko 2019 pagkatapos ipaidaeum ro isla sa rehabilitasyon.
Mabahoe nga bulig sigon ro bag-ong slogan agud nga maabu pa ro maengganyo nga mga turista nga magabista sa Boracay ag sa bilog nga nasyon.
Apang ginpahayag ni Delos Santos nga indi pa nanda magamit makaron nga dag-on ro bag-ong slogan para sa andang mga promotional videos ag ginapanupod nga mga brochures bangud nga medyu mahae ro pag-produce kara it bag-o.
Agud nga makasabay suno kana, ginakinahangean nanda nga makapa-obra it mga bag-ong audiovisual presentation gamit ro bag-ong ‘Love the Philippines’ slogan, kun sa siin ro pondo para kara hay owa naeakip sa gintaeana nga 2023 budget it taeatapan.
Nagakinahang-ean sigon raya it konsultasyon sa mga stakeholders ag maid-id nga pagtuon.
Dugang pa ni Delos Santos nga nagapati imaw nga mas makapamayad kunta kun ipabilin ro dating slogan it DOT kapareho it gina-obra it mga kaiping nga nasyon sa Asya agud nga mapabaskog ro ginatawag nga tourism brand recall.
