NATIONAL News — Ginapabayad it Supreme Court it danyos ro sangka manugturo sa pamilya it sangka estudyante nga namatay matapos tamaan it puno it saging nga ginsugo nana nga tapson it anang estudyante.
Suno sa Korte, ro mga manugturo hay pwedeng magapanabat para sa kahalitan nga gintuga sa sangka estudyante sa idaeum it anang pagdumaea kon owa sanda nagpatigayon it nagakaigo nga pagtinguha ukon due diligence para mapugngan ro anumang insidente.
Sa desisyon nga ginsueat ni Associate Justice Ramon Paul L. Hernando, ginpabakod it First Division it Korte ro saeabton ni Gil Apolinario, ro punong-guro it Brgy. Palale Elementary School sa Sta. Margarita, Samar, para sa danyos nga bunga it pagkamatay ni Francisco De Los Santos.
Ginsugo ni Apolinario ro sangka 15-anyos nga estudyante nga tapson ro puno it saging maeapit sa eskwelahan sa kilid it highway. Tinamaan si De Los Santos nga kato hay sakay it sangka motorsiklo.
Ginapabayad it Korte si Apolinario it P355,000.00 bilang danyos ag gastos sa pagbista sa naaywan nga pamilya ni De Los Santos.
Suno sa Korte Suprema, ro mga manugturo ag pinuno it eskwelahan hay may saeabton sa mga aksyon it mga estudyante samtang sa idaeum it andang pagdumaea.
Maskin sa guwa it oras it pagtu-on, ro mga manugturo hay dapat nga magpatigayon it nagakaigo nga pagtinguha kon nagapa-obra it mga hilimuon sa mga estudyante.
Sa idaeum it Civil Code, ro sangka tawo nga nagatuga it kahalitan sa iba bangud sa pagkasaea ukon pagpabaya hay dapat magbayad para sa kahalitan nga nahimo.
Sa idaeum it prinsipyo it vicarious liability, ro nasambit nga obligasyon hay nagakadapat man sa mga manugturo nga nagadumaea ag mga pinuno it eskwelahan nga nagapangunang responsable sa mga aksyon it andang mga estudyante samtang sa idaeum it andang pagdumaea, mag-eowas kon maipakita nanda nga naghimo sanda it nagakaigo nga pagdahan.
Ginpahayag it Korte nga napas-eawan si Apolinario nga magpatigayon it due diligence. Owa nana gin-obra ro mga kinahangeanon nga pagdahan agud nga masiguro ro kaeowasan it mga estudyante ag iba pang mga tawo sa kaeapit nga lugar nga pwedeng maapektuhan.
