POLICE Report — Grabeng selos ro naging rason it asawang eaeaki matapos nga bun-on it makapilang beses hasta nga mapatay ro anang dating misis sa sueod it sangka eskwelahan sa Las Piñas City, agahon it Lunes, Marso 10.
Nakilaea ro nadakpan nga suspek nga si alyas Dennis, 38, public coordinator services it Bacoor, ag residente it Polido Compound, Panapaan 3, Bacoor, Cavite.
Owa eon naka-abot nga buhi ro biktima sa Alabang Medical Hospital tuga it 37 nga igo it pagbuno sa nagkaeain-eain nga parte it anang eawas.
Ro biktimang si alyas Rose, 51, public school teacher sa Lydia Aguilar National High School hay residente it 38 Aerospace, CAA, BF International, Las Piñas City.
Base sa ginpatigayon nga imbestigasyon it kapulisan, natabu ro insidente bandang alas 8:45 it agahon sa Lydia Aguilar National High School (LANHS) sa Camia St., TS Cruz Subd, Brgy. Almanza Dos, Las Piñas City.
Nag-agto ro suspect sa eskwelahan ag dumiretso sa faculty office ag kat makita kara ro anang dating asawa hay nagbo-oe raya it kutsilyo ag pauman-uman nga ginbuno ro biktima.
Nasaksihan pa it pila sa anang mga kaibahan nga manugturo ro krimen apang owa sanda it mahimo bangud sa kahadlok nga basi sanda man ro balikan it suspect.
Madasig nga rumesponde ro mga miyembro it Las Piñas City police nga nagresulta sa insigidang pagka-aresto sa suspect ag pagkarekober sa anang daea nga 12-pulgadang kutsilyo nga gingamit sa krimen.
Nasayuran nga nag-iba ro daywa ko 2011 apang owa nabugayan nga makaangkon it unga sa sueod it haeos 13 anyos nanda nga relasyon antes nga nagbueag ko nagtaliwan nga 2024 bangud sa sobrang pagkaseloso it suspect.
Presenteng nakakulong sa custodial facility it Station Investigation and Detection Management Section ro suspect samtang ginapahaum eon ro kasong parricide kontra kana sa Las Piñas City Prosecutor’s Office.
