KALIBO,Aklan– Mataas nga marka ro gintau ni Atty. Harry Sucgang, sangka political analysts sa probinsiya it Aklan kay unang dag-on it pagpanerbisyo ni Pangueong Ferdinand ‘Bongbong’ Marcos Jr.
8 over 10 ro anang gintau nga grado bangud nga sa pihak sigon it mga problema nga ginapangatubang hay natigayon nana nga mausuyan it solusyon agud nga mapahagan-hagan ro epekto partikular sa nagatinaas nga presyo it produktong petrolyo ag pagkaon nga ro pinaka-ugat hay tuga it giyera sa tunga it Russia ag Ukraine nga bukon nana it kontrolado.
Gindayaw man ni Atty. Sucgang ro mga ginpatigayon kara nga biyahe abroad kun sa siin nakaangkon sigon it mga foreign investments nga posibleng magatuga it maabu nga trabaho.
Sa pihak nga parte, ginahinyu eamang ni Atty. Sucgang nga dapat eon nga magtaeana ro Pangueo it agriculture secretary nga magabueos kana agud nga maresolba ro mga nagapangunang problema kapareho it smuggling , importasyon ag iba pa.
Kabay suno kana nga makabutang imaw it competent ag honest nga sekretaryu sa nasambit nga departamento nga ginakabig nga lifeblood it nasyon.
Ginaeauman nga iga anunsyo nana sa anang ikaywang state of the nation address ukon SONA ro mapilian nga DA secretary.
