Mas mabahoe nga pondo para sa masunod nga dag-on bulig para sa pagbangon sa pandemya
Kadungan it panibag-ong administrasyon ag mga plano para sa nasyon, gin-anunsiyo it Department of Budget and Management (DBM) nga posible sigon nga mag abot sa P5.268 trilyon pesos ro full-year budget it magasueod nga administrasyon ni President-elect Ferdinand ‘Bongbong’ Marcos, Jr., sa 2023.
Raya hay kasunod it 181st meeting it inter-agency Development Budget Coordination Committee nga ginaeakipn it mga economic managers it nasyon.
Ro proposed budget hay katumbas it 22.1 percent nga gross domestic product it nasyon.
Ro budget ceiling nga aprubado it economic managers hay mas mataas kumpara sa P5.242 trillion pesos nga gin-aprubahan it mga economic team ko December 2021.
Ro DBCC hay ginaeakipan it mga sekretaryo it Socioeconomic Planning, Finance , Budget and Management ag maskin it Bangko Sentral ng Pilipinas.
Suno sa economic team, ro desisyon it mga economic managers nga makaangkon it P5.268 trillion pesos cap para sa 2023 national budget hay bangud man sa mas mataas nga projected revenue collections sa masunod nga dag-on.
Samtang, base man sa pagtantiya it mga economic managers, ro disbursements sa masunod nga dag-on hay posibleng maga-abot sa P5.086 trillion pesos ukon katumbas it 21.3 percent it GDP.
Nagapabilin man ro target it DBCC nga fiscal deficit sa 6.1 percent it ekonomiya sa 2023.
Nauna eon nga ginpahayag ni Marcos nga ginapanan-aw ro national budget para sa 2023 nga puwedeng maboe-an it pondo para sa economic stimulus measure bangud gihapon sa naexperiensiyahan nga COVID-19 pandemic.
Kumpiyansa kita nga magiging maayos ag wais ro paggamit sa nasambit nga pondo.
Naintindihan naton ro pagkinahangean agud nga eubusan nga makabangon halin sa pandemya.
Kamana man ro pagpadayun sa mga programa ag proyekto nga para sa kamaeayran it tanan.
Angot kara, nagaeaum kita nga magiging transparent ro gobyerno pag-abot sa pondo , ro makita ag mabatyagan it publiko.
