KALIBO, Aklan—Padayun nga makaboto sa eleksyon sa masunod nga dag-on ro masobra sa 700 nga mga voter registrants sa isla it Boracay.
Raya hay matapos nga owa nagmadineag-on ro nag-petisyon nga mabo-oe ro andang pangaean sa voter’s list it Commission on Elections ukon Comelec.
Suno kay Crispin Raymund Gerardo, tagapaghambae it Comelec-Aklan nga owa it baeasihan agud nga duea-on sanda sa listahan.
Ginpaidaeum sigon sa hearing ko Oktubre 20, 2021 it Election Registration Board (ERB) it Comelec ro aplikasyon it registration ag transfer of registration records it mga raya kun sa siin hay nagtambong man sanda agud nga ipaathag ro andang pag-istar sa lugar it masobra sa an-um nga buean eon bilang requirement para sa registration.
Nag-ugat ro reklamo matapos nga mataeupangdan ro pagtaas it numero it voter registrants eabi eon ro mga naghalin sa barangay Yapak ag Balabag sa katung-anan it Hulyo 1 hasta Oktubre 13, 2021.
Ginpamilit it petitioner nga si Edwin Pelayo, residente it Barangay Manocmanoc sa anang sinumpaan nga panaysayon nga ro mga raya hay bukon it residente it banwa it Malay.
Partikular nga gin-kwestiyon kara ro 401 nga voter registrants sa Balabag ag 371 nga voter registrants sa Yapak.
Nasayuran nga magiging three-cornered fight ro engkwentruhanay sa pagka-mayor sa banwa it malay nga ginaeakipan nanday incumbent mayor Frolibar Bautista, Yapak barangay captain Hector Casidsid ag dating Yapak barangay kagawad Marilyn Villaresis.
