KALIBO, Aklan — Ginsug-an ag gin-eubong sa dump site it Kalibo ro masobra sa 210 kilo it nagkaeain-eain nga misdeclared nga karne ag iba pang meat products.
Raya hay kasunod it pagkakumpiska it mga raya sa Kalibo International Airport sa tunga it paeag it African swine fever (ASF).
Suno kay Dr. Christine Lyn Melgarejo, Veterinarian Quarantine Officer it Bureau of Animal Industry nga owa sigon raya gindeklara it mga pasahero nga halin sa China sa andang mga bagahe ag nadiskubre eamang kat ginpaagi sa scanning it x-ray machine.
Sa pihak suno kana it hugut nga paandam sa mga dumueuong hay padayun ro mga raya nga nagadaea it mga pagkaon halin sa andang nasyon agud nga baeunon sa pagbakasyon sa isla it Boracay.
Samtang, nagplastar eon man it checkpoint ro DA ag OPVET sa entry ag exit boarder point it Aklan agud nga masiguro nga owa it makasueod nga anumang kasapatan nga posibleng pagahalinan it sakit nga Avian Influenza (bird flu), Foot-and-Mouth Disease (FMD) ag African Swine Fever (ASF).
