KALIBO, Aklan—Kapin sa P4,120,000 pesos eon ro nautilize nga kwarta maghalin sa quick response fund it provincial government nga gintaeana sa mga hog raisers nga apektado it African Swine Fever ukon ASF.
Suno kay Dra. Mabel Siñel it Office of the Provincial Veterinarian ukon OPVET, sa 17 nga kabanwahanan sa bilog nga probinsya it Aklan hay daywa eon lang ka munisipalidad ro uwa it kaso it ASF virus nga ginakaeakipan it banwa it Libacao ag Buruanga.
Angot kara, ginaamat-amat eon nanda it pagpanupod ro financial assistance sa mga kwalipikadong hog raisers kon sa siin ro andang mga alagang baboy hay ginpaidaeom sa culling.
Hasta eon lang sigon sa Agosto 31 ro andang pagbaton it mga listahan halin sa mga natungdan nga munisipalidad ag pagkatapos it nasambit nga petsa hay inde eon sanda magbaton it igasumiter pa nga mga datos.
Raya hay bangud nga iga-reallign ro nabilin nga pondo sa iba pang programa it gobyerno.
Sa makaron suno kana hay may P2,880,000 pa nga nabilin nga haega maghalin sa QRF it gobyerno probinsyal.
Madumduman nga nagtaeana ro provincial government it P10 milyon pesos para sa mga hog raisers nga apektado it ASF virus.
Sa nasambit nga kantidad, P3 milyon pesos ro naadto sa taeatapan it OPVET ag ro P7 milyon pesos hay para sa mga kwalipikadong benepisyaryo.
