KALIBO, Aklan—Mayoriya it mga public schools sa probinsiya it Aklan ro mas ginpili nga magpatigayon it blended learning bilang andang transition option sa nakataeana nga pagbukas it klase sa Agosto 22.
Suno kay Dr. Hernani Escullar Jr., tagapaghambae it Department of Education ukon DepEd Region 6 nga sa kabilugan nga 285 nga public elementary schools sa Aklan, 113 ro nagpabor sa blended learning ag 172 ro full distance learning; sa 34 nga integrated schools, haeos tanan ro mga raya hay gusto ro blended learning modality kamana man sa 59 nga secondary schools.
Owa pa suno kana it eskwelahan nga nakaangkon it kabaskog it buot nga magpatigayon it 5-days nga in-person classes bilang andang transition option.
Ginklaru ni Dr. Escullar nga sa pagbukas it klase sa Agosto 22, may option ro mga eskwelahan nga magpatigayon it remote classes, blended learning mode ukon in-person classes.
Sa idaeum it blended learning, makaangkon ro mga estudyante it tatlong beses in-person classes ag daywang adlaw nga distance learning kada domingo.
Sa katung-anan it transition period, pwedeng makapatigayon it ap-at nga adlaw nga in-person classes ag sang adlaw nga distance learning.
Apang tanan nga mga pampubliko ag pribadong eskwelahan hay kinahangean nga magpatigayon it in-person classes pag-abot it Nobyembre 2, sandig sa DepEd Order No. 34.
Antes ro implementasyon it transition options, ro tanan nga mga eskwelahan hay nakapatigayon eon it konsultasyon sa parents-teachers-association ukon PTA, stakeholders ag natungdan nga division offices.
Ginahueat pa sigon nanda ro opisyal nga guidelines nga igapaguwa it national office sa Nobyembre 2.
