Bumoto it pabor ro mayorya it mga mamalidha sa South Korea para sa mosyon sa impeachment ni President Yoon Suk Yeol, adlaw it Sabado, Disyembre 14.
Gin-anunsiyo ni National Assembly Speaker Woo Won-shik nga halin sa 300 nga mamalidha, 204 ro bumoto it pabor, 85 ro nagpamaeabag, 3 ro nag-abstain samtang may 7 invalid votes.
Bangud sa eampas pa sa kinahang-ean nga 200 ro numero it mga mamalidha bumoto it pabor para maipasa ro mosyon para sa impeachment, gindeklara it Speaker nga pasado eon ro impeachment vote ag gintapos ro session.
Samtang, makaron nga pasado eon ro impeachment motion para kay Yoon, una eon sa alima it constitutional court para pagdesisyunan ro impeachment ni Yoon sa sueod it an-om nga buean.
Suno kay Speaker Woo, nakataeanang suspendihon ro presidential powers ag duties ni Yoon sa oras nga mabaton eon nana ro kopiya it dokumento sa impeachment ag kon nabaton eon raya it Constitutional Court.
Samtang suspendido si Yoon, si Prime Minister Han Duck-soo ro magabueos anay kana bilang acting president.
Maskin suspendido ro gahom ni Yoon, magapabilin gihapon imaw sa opisina.
Inde raya maduea hasta sa magdesisyon eon ro Constitutional Court kon magapabor raya sa impeachment.
