KALIBO, Aklan—Ginpaathag ni Municipal Disaster Risk Reduction and Management Council ukon MDRRMC-Kalibo head Terrence Toriano nga pirme nana nga ginapadumdum sa anang mga rescuers nga magsunod sa protocols ag safety sa pagresponde sa disaster response.
Raya hay kasunod it pagkamatay it limang disaster workers sa Bulacan samtang sa rescue operations sa pagpanasaea it super typhoon Karding.
Suno kay Toriano nga may patakaran sanda nga kon delikado ro sitwasyon kapareho it masueog nga flashflood ag magdueom eon ro palibot hay ginapundo nanda ro operasyon.
Kaeabanan sigon nga nakakabaton sanda it pagbatikos bangud kara apang bilang rescuers hay pirme nanda nga gina-isip ro “safety first”.
Ginpahayag dugang nga dapat nga owa eon it rescue operation kon nakapatigayon eon it early evacuation.
Bukon eon suno kana it saea it mga rescuers kon nagapakamatig-a ro mga residente nga magbakwit.
May ginasunod sigon ro tanan nga flood early warning system kon maeain ro tiempo.
Indi sigon malikawan ro mga insidente nga nagakatabu ag bilang pagdahan hay kinahangean nga likawan ro pagsueong sa delikado nga sitwasyon bangud nga medyu bukon it manami nga isipon nga ro mismong mga tagasalbar hay sanda pa ro namamatay.
Makabig sigon raya nga eye opener nga dapat ro mga rescuers hay may nagakaigo nga training sa disaster response and rescue.
Sa pihak nga parte, aminado man si Toriano nga haeos 90 porsiyento it anang mga responders hay job order ag bukon it regular nga empleyado it munisipyo.
Ginkalipay man nana ro tikang makaron it daywang kapueongan it kongreso nga uman nga pagbuhi sa department of disaster resilience kun sa siin may chansa nga makadugang it personnel nga permanent.
