KALIBO, Aklan–Sigidas makaron ro monitoring it Municipal Disasters Risk Reduction and Management Office (MDRRMO)-Numancia sa lebel it tubi sa Aklan river.
Raya hay kasunod it padayun nga pagbubu it uean halin ko nagtaliwan nga adlaw kung siin nakaangkon eon it pagtaas sa lebel it tubi sa mga kasubaan.
Ginakabaeak-an ro posibleng pagbaha eabi pa ag nagatinaas eon ro tubi sa Aklan river sa banwa it Libacao.
Suno kay Arvin Tolentino, Head it MDRRMO-Numancia nga ginrekomenda nanda sa Office of the Mayor kainang alas-7:00 it agahon ro pagsuspendi it klase sa tanan nga lebel it pribado ag pampublikong eskwelahan makaron nga adlaw sa bilog nga banwa.
Raya hay bilang pagpahaum engkaso nga makaangkon it pagbaha kamana man nga malikawan ro pilang ka mga insidente ag aksidente.
Ginlaygayan man kara ro mga pumueoyo ag maging alerto eabi eon ro naka-istar sa mga low-lying areas ag masami nga ginabaha nga lugar nga magpangaman agud malikawan ro grabeng kahalitan.
Samtang, pila pa sa mga lokal nga gobyerno nga nagsuspendi it klase hay ro Kalibo, Libacao ag Ibajay.
