KALIBO, Aklan — Hugut ro naging panindugan it Municipal Economic Enterprise Development Office (MEEDO)-Kalibo nga hasta eon lang sa masunod nga domingo ro pagtinir it mga vendors sa Kalibo Public Market.
Suno kay MEEDO head Mary Gay Quimpo-Joel nga umpisa ko adlaw it Huwebes, Setyembre 5 hay kinahangean nga amat-amat eon nga magpanghakot ro mga vendors bangud nga iga-kordon eon nanda ro kabilugan it tindahan sa masunod nga domingo agud nga taw-an it daean ro modernization project.
Paga-umpisahan eon suno kana it contractor ro construction anuman nga adlaw sa masunod nga domingo rason nga dapat eon nga makasaylo ro mga vendors sa gintaeana kanda nga relocation site sa Kalibo Eastern Side Terminal sa San Lorenzo Drive, Barangay Andagao, Kalibo.
Ro iba suno kana sa mga stall holders hay owa pa nakasaylo bangud nga nagapadayun pa ro pagpatindog it andang mga temporary stalls nga sanda mismo ro naggastos.
Sa makaron hay haum eon ro mga stalls sa sueod ag guwa it terminal nga ginpatindog it LGU Kalibo nga pwedeng okupahan it mga vendors sa fish, chicken ag meat sections ag iba pa.
Sa ginpatigayon nga monitoring it Bombo Radyo Kalibo sa gintaeana nga deadline ko Huwebes, nagapabilin nga normal ro pag negosyo sa tindahan.
Sa pihak nga parte, ginkumpirma ni Quimpo-Joel nga nagka-atubang eon sanda it mga lideres it Kalibo Public Market United Stall Owners and Vendors Association ko nagtaliwan nga adlaw, apang ro iba sigon sa andang demand hay indi pa maitau sa makaron partikular ro ginapangayo nga new rate sa uman nga pag-operate it tindahan bangud nga kinahangean pa raya nga ipaidaeum sa deliberasyon.
Ginpasiguro man sigon ni Kalibo Mayor Juris Sucro nga igatau ro memorandum of agreement apang bukon it ora-orada bangud nga may ginasunod nga proseso para kara.
Dugang pa nga imbes nga 6-months moratorium para sa stall rentals nga ginahinyu it mga vendors hay gin-panaba raya it MEEDO pinaagi sa andang board resolution sa tatlong buean agud nga indi man sanda malugi.
Samtang, ro mga maga-construct it temporary stalls sa kilid it daean gamit ro andang kaugalingon nga gastos hay indi pagasukton it bayad.
Raya tanan sigon hay igapa-agi pa sa approval it Sangguniang Bayan para sa pagbaeay it ordinansa.
Samtang, gin-umpisahan eon man ro pagpalibot it “application to lease” para sa mga interesadong mag-occupy it stalls sa relocation site kun sa siin dikara nakabaehag ro rules and regulations .
