Sa pihak it mandu nga bawae eon ro online sabong, may mga nakakaeusot sa gihapon nga talpakan.
Rason nga gin umpisahan eon it Philippine National Police (PNP) ro crackdown kontra sa ilegal nga e-sabong nationwide.
Kadungan kara ro uman nga panawagan sa publiko nga maglikaw sa sugae.
Nauna eon nga natukiban nga naga-operate gihapon ro pilang online sabong websites sa pihak it mandu ni Pangueong Rodrigo Duterte nga papunduhon eon raya.
Apela sa mga sabungero, indi eon pag-eabagon ro laye bangud nga nabutang eamang sa aeang-aeang ro suweldo.
Ro kwarta nga dapat hay para sa pamilya , indi eon italpak bangud nga mas eamang nga magakalisod.
Ro sambilog pang maeain nga ginatuga it pagka-adik sa sugae hay ro paghimo it krimen.
May mga naeakot sa paeanakawan, holdap ag nagaresulta pa sa pagpatay.
Mabahoe nga hangkat sa mga awtoridad ro nasambit nga problema.
Magsalig kita sa ginhambae it PNP nga owa sanda it pagasantuhon sa kampanya kontra sa e-sabong.
Raya hay nagakahueugan nga bukon eamang it mga manugtaya ro puntirya kundi ro mismong mga promotor, ahente ag kunta hay ro mga gambling lord nga owa it kahadlok sa laye.
Sa makaron, padayun sigon ro andang case build up ag pakikipag-angot sa mga service provider agud nga maipasara ro mga online sabong website nga posibleng abuton it daywang domingo.
Kabay nga maintindihan it mga sugaroe nga owa it nagadaog sa sugae.
Magdaog ka kon amat, mas abu gihapon ro pierde.
Kon maipusta mo eon ro tanan, pati kaugalingon nga kaeag, posibleng pati pamilya hay igataya.
Makarondaya kasubo kon sudlon ro sugae.
Rason nga samtang masarangan pa, magpundo eon.
Kun minatuod nga adik eon, may pamaagi sa gihapon agud nga makahilway.
