KALIBO, Aklan—Kasado eon ro mga aktibidad para sa selebrasyon it Kalibo Señor Santo Niño Ati-Atihan Festival 2025.
Suno kay Jay-ar Arante, head it communication affairs it LGU Kalibo nga umpisa January 10 hasta 19 hay maga-arangkada ro kasadyahan para sa ginakabig nga sambilog sa pinakamagarbo ag pinakamabahoe nga festivals sa Pilipinas ag ginbansagan nga “The Mother of All Philippine Festivals.”
Sa Enero 16 hay pagahiwaton ro gina-abangan nga Higante Parade.
Magapasundayag sa Enero 18 ro mga tribu ag grupo nga magapasakop sa Sad-Sad Ati-Atihan Contest and Individual Costume Contest.
Sa kaadlawan sa Enero 19 hay makaangkon it Pilgrims’ mass, Grand procession, Religious parade, Closing Liturgy ag Awarding ceremony sa gabi-i sa Magsaysay park.
Sa pihak nga parte, ginkumpirma ni Arante nga kapin sa 2,000 nga mga pulis ro iga-deploy agud nga masiguro ro kaeowasan ag seguridad sa tiempo it festival.
Kaibahan sa security group ro mga personnel halin sa Bureau of Fire Protection, Municipal Risk Reduction Management Office, ag kapulisan halin sa nagkaeain-eain nga probinsiya sa Western Visayas.
Ginaeauman suno kana nga magabuhos eon man ro mga festival-goers sa Kalibo para sa Ati-atihan Festival bangud nga makaron pa eamang hay haeos punuan eon ukon fully-booked eon ro mga hotels, inns ag mga boarding houses sa banwa it Kalibo.
Samtang, owa it anuman nga pagbag-o suno kana sa mga patakaran nga ginapagtuman sa mga magapasakop sa Ati-Atihan kun sa siin bawae nga magdaea it backpacks ukon tote bags, mag-eowas sa mga ginikanan nga may daea nga mga gamit para sa mga unga kamana man ro mga drummers nga may bitbit nga gamit sa banda.
Bawae man ro mga debotelyang ilimnon sa festival area ag mga mataeum nga hinganiban ag mataeiwis nga mga items.
Hugut man nga ginapatuman it LGU ro pagbawae sa pagpanigarilyo, vaping, ag pagkalhit it basura.
Ginduea eon man ro pag-isyu it car pass.
Agud nga ma-maintain ro kaayusan, ro tanan nga mga street performers hay gin-abisuhan nga magsunod eamang sa sangka direksyon.
Pila sa mga kilaeang artista nga gin imbitahan hay sanday Willie Revillame, Beauty Gonzales, bandang Sweet Notes ag iba pa.
