KALIBO, Aklan—Haom ro Cooperative Alliance for Modernized Transport Business Industry Corporation nga saepon ro mga commuters nga maapektuhan it igakasa nga tatlong adlaw nga transport strike it grupong Manibela nga magaumpisa sa Hunyo 10, adlaw it Lunes.
Suno kay Louie Tabios, tagapaghambae it nasambit nga kooperatiba nga sa kamatuoran hay uwa dapat it mga korporasyon nga magasunod sa ginakasa nga transport stike bangud nga eabag raya sa sueondanan it Land Transportation Franchising and Regulatory Board ukon LTFRB bangud nga ro aplikasyon it sektor it transportasyon hay para magpanerbisyo sa mga sumaeakay.
Ginaeauman nga inde maparalisa ro transportasyon sa sueod it tatlong adlaw bangud nga haeos 80 porsyento eon ro mga nagpaconsolidate nga unang phase para sa Public Utility Vehicle Modernization Program.
Ginpanindugan ni Tabios nga saea ro panawagan it Manibela bangud nga uwa imaw it planong magsunod sa programa it gobyerno.
Ro punto sigon nana hay “magkaisa para magkanya-kanya” rason nga ro iba sa andang grupo hay nagkalas eon sa andang grupo bangud nga uwa man naila nga madueaan it pangabuhian.
Ginpasiguro ni Tabios nga inde pagkueangon ro mga behikulo sa sueod it tatlong adlaw nga igakasang transport stike.
Nasayuran nga base kay Manibela president Mar Valbuean, kapin sa 100,000 it mga miyembro nanda ro magapasakop sa transport strike maghalin sa Metro Manila, Calabarzon, Central Luzon, Ilocos Region ag Cordillera Adminstrative Region.
