Kalibo Aklan —–Doble ro pagdahan nga ginahimo it mga Filipino seafarers ag ginapatuman nga safety protocol it andang kompaniya bangud sa paeag it coronavirus disease (COVID- 19).
Suno kay Lester Cadunggan, tubong Kalibo ag sangka seafarer nga antes nga mag-dungka ro andang barko sa pantalan hay gina-abisuhan sanda nga hugut nga ginabawae ro magpanaog.
Kon may nagasaka suno kana nga bisita hay required sanda nga magsuksok it Personal Protective Equipment (PPE) ag magpatuman it social distancing .
Regular man sigon ro pag-check it andang body temperature ag disinfection agud nga masiguro ro kaeowasan it mga crew.
Gindugang pa kara nga ro andang barko hay naghalin sa Africa ag naga-eayag makaron paagto sa United Arab Emirates.
Makaron nga tiempo suno kana hay bukon eamang it COVID-19 ro andang ginakahadlukan kundi maskin ro mga pirata .
Na-extend suno kana ro andang kontrata bangud nga indi makasampa sa barko ro anda kunta nga kabueos bangud sa lockdown.
Samtang, naintindihan sigon nana ro mga naga-discriminate sa mga kapareho nana mga marino ag mga naga-uli nga OFWs bangud nga ro kada isaea makaron hay nagapangaman ag ginakabig ro kada isaea nga carrier it virus.
