KALIBO, Aklan—Sunod-sunod eon ro pag-aeabutan it mga football players maghalin sa mga nagkaeain-eain nga nasyon para sa ginabantayan nga FIFA World Cup 2022 sa Doha, Qatar.
Suno kay Bombo International Correspondent Mae Ann Masangya, sa pagpanaog it mga players sa andang ginsakyan nga eroplano hay diretso ro mga raya sa ginpahaom it gobyerno nga resort ukon villa kon siin sanda temporaryo nga magatinir para sa kabilugan nga tournament nga magabuhay it sang buean.
Bantay sarado sigon it mga soldado ro entrance ag exit it villa para masiguro ro seguridad it mga players kaibahan ro andang coaching staff ag iba pang indibidwal nga kaeakip sa andang delegasyon.
Ginpahayag dugang ni Masangya nga may gintaeana nga bus sa tagsa-tagsa ka participating teams para inde malisdan ro mga raya nga mag-adto sa stadium ukon venue nga andang pagahampangan.
Kada adlaw suno kana hay may mga kasadyahan nga ginapatigayon angot sa nakataeana nga pag-umpisa it FIFA world cup.
Bilang pagkilaea sa mga football players it nagkaeain-eain nga nasyon hay ginkabit ro bandera it mga participating teams para sa mga tumaean-aw.
Gusto sigon it gobyerno it Qatar nga makilaea ro andang nasyon sa bilog nga kalibutan rason nga enggrande ro ginhimo nga preparasyon para sa prestihiyosong sporting events.
