KALIBO, Aklan—Sangka resolusyon ro gindihon sa sangguniang bayan it Kalibo agud nga magtau it direktiba sa tanan nga mga barangay ag office of senior citizen affairs nga maghimo it insigidang pagparehistro sa mga katigueangan it banwa.
Ginsuhestiyon ni SB member Augusto Tolentino ro nasambit nga resolusyon agud nga ma-update ro record it management system it National Commission of Senior Citizens, ro ahensiya it gobyerno nga nagadumaea makaron sa kinahangeanon it mga katigueangan sa nasyon.
Angot kara, gin engganyo nana ro mga naga-edad it 60 anyos pataas nga magparehistro sa database it NCSC bilang suporta sa nagapadayun nga pagparehistro sa bilog nga nasyon para sa tanan nga mga lolo ag lolang Pilipino.
Ro pagtukod sigon it database it senior citizens sa nasyon hay base sa Implementing Rules and Regulations it Republic Act No. 11350.
Pinaagi kara hay mas magiging madali ro pagtumod ag pagtau it benepisyo eabi eon sa idaeum it expanded centenarian act kun sa siin sa pagtungtong sa edad nga syen anyos hay may mabaton nga cash money nga 100,000 pesos ag dugang nga 20,000 pesos halin sa LGU-Kalibo nga plano nana nga dugangan pa agud nga mahimo nga 50,000 pesos pinaagi sa pagduso it sangka ordinansa.
Sa makaron hay padayun nga nagabaton ro mga senior citizens it kada buean nga Social Pension stipend nga P500 sa mga pobre nga senior citizen.
Halin sa DSWD hay nakataeana man nga igasaylo eon ro pagpanupod it social pension program sa National Commission of Senior Citizens.
