KALIBO, Aklan — Nagapatigayon eon it nagakaigo nga pagpahaum ro law enforcement agencies sa Western Visayas agud mabaeabagan ro posibleng kinagamo nga magatuhaw sa paeaabuton nga May 2025 midterm elections, partikular ro potensyal nga pagpamaeag it rebeldeng New People’s Army (NPA).
Igabutang sa “high alert” ro 3rd Infantry Division (3ID) it Philippine Army ag Police Regional Office 6 (PRO-6) sa pag-umpisa it pag-file it certificates of candidacy (COC) sa Oktubre 1, 2024.
Suno kay Brigadier General Jack Wanky, regional police director nga pagatutukan nanda ro kaeowasan ag integridad it election process ag indi pagpabay-an nga magpang-gulo ro anuman nga grupo ukon rebelde .
Nagakabaeaka ro mga owtoridad sa mga reports nga gina pwersa it mga rebeldeng NPA ro mga kandidato nga magtau it “campaign fees” .
Nagpaandam man si Lieutenant Colonel J-Jay Javines, spokesperson it 3ID nga posible mapasakaan it kaso nga “conspiracy to commit rebellion” ro magatau it kwarta sa nasambit nga grupo.
Bangud kara, ginpabaskog it militar ag mga kapulisan ro andang pag-monitor sa mga aktibidad it mga rebelde.
Sa pihak nga parte, ginkumpirma man ni Lieutenant Colonel Arnel Solis, PRO-6 spokesperson nga haeos 100 nga mga police personnel ro nakataeana nga iga-deploy agud masiguro ro kaeowasan sa mga lugar nga pagahiwatan it filing it mga kandidato it andang COC.
