KALIBO, Aklan–Sambilog sa pinaka-apektado makaron it sigidas nga pagsipa sa presyo it produktong petrolyo ag domino effect kara sa mga nagapangunang baeak-eon ag serbisyo hay ro sektor it agrikultura.
Partikular nga naga-antus kara hay ro mga ordinaryong mangunguma nga nagasalig eamang sa andang sangkiri nga kita sa eugta nga andang gina-umhan.
Suno kay Junnival Villas, residente it Brgy. Linabuan Sur, Banga, nagapangunang problema nanda makaron ro mahae nga presyo it mga produktong ginagamit sa eanas kapareho it abono, insecticide ag langis nga ginagamit sa andang makinarya.
Maskin sigon ro bayad sa pagpatanom hay nagmahae eon ro pagsinueoktan.
Ro makasueobo suno kana hay pag-abot sa harvest, barato eamang ro buoe sa andang ani nga paeay.
Kung pagasumahon sigon ro tanan nga gastos hay haeos owa eon sanda it kita ag masami nga lugi pa.
Halin sigon sa dating P900 nga presyo it kada sako it abono, makaron hay nagabalor eon raya it kapin sa P3,000.
Raya hay mag-euwas pa sa kalisod nga andang paga-atubangon sa oras nga maagyan it kalamidad ukon atakehon it pesti ro andang paeay.
Nagaeaum sigon sanda nga maghimo it aksyon ro gobyerno para mapanaba ro presyo it gasolina ag mga baeak-eon.
