KALIBO, Aklan—Problemado makaron ro mga driver ag motorista angot sa mataas nga sukot sa presyo it produktong petrolyo nga ginpatuman makaron nga adlaw it Martes.
Suno kay Fred Crisostomo it New Washington-Kalibo Transport Cooperative, nakibot sanda sa P6.85 nga dugang nga presyo it diesel kada litro ag P1.20 sa kada litro it gasolina.
Sa pihak kara, owa pa sanda it plano nga magpataas it pamasahe bangud nga mag-eowas sa kaeo-oy nga nabatyagan sa mga commuters hay owa pa sanda nakabo-oe it panibag-ong fare matrix halin sa Land Transportation Franchising and Regulatory Board ukon LTFRB.
Nagapabilin sigon sa P20 ro andang pamasahe sa nasambit nga rota.
Ginpahayag dugang nga matsa bukon it patas ro nagakatabu bangud nga tigsangkiri eamang kon may rollback apang bigtime kon magpataas.
Owa pa sigon sanda nakabawi sa masobra sa ap-at nga piso nga sunud-sunod nga limang domingo nga pagpatuman it manaba nga presyo.
Dugang sigon nga kalisod kanda nga mga driver ro dugang nga sukot it mga kompaniya it langis.
Ro haeos ginakita sigon nanda hay bastante eamang para sa andang pagkaon ag owa eon it para sa iba pang kinahangeanon.
Bangud kara, uman nanda nga ginapanawagan sa gobyerno nga maghimo it nagakaigo nga aksyon agud nga mapahagan-hagan ro epekto it oil price increase.
Apela man nanda nga padayunon ro fuel subsidy sa mga drivers agud nga mapahagan-hagan ro epekto it pagsipa sa presyo it petrolyo.
