KALIBO, Aklan — Bangud nga uso ro magpakita it pagpalangga makaron nga Valentine’s Day, dagsa eon ro mga nagabakae it bueak sa mga flowers shops sa kahabaon it Roxas Avenue, Kalibo.
Apang sa pihak kara, nataeupangdan ro pagtaas it presyo it mga fresh flowers eabi eon ro mga madahog makaron nga okasyon.
Sa report it Bombo News team, kon dati hay makabakae it mga bouquet nga nagabalor it P200, makaron hay haeos nag doble eon raya sa P500, kun sa siin raya ro pinakabaratong bouquet it assorted nga bueak.
Ro mga bouquet it rosas hay naga-abot eon sa P100 hasta P120 kada stem ukon kapin sa P1,200 ro sang dosena.
Para sa mga nagatipid ag naga-usoy it swak sa andang budget, ro diskarte eon lang it mga nagabakae hay kada stem ro ginabakae bangud nga ro local rose hay mabakae it P100.
Mas mahae ro mga imported nga rosas nga halin sa China ag ro mga Ecuadorian rose.
Madahog man ro mga lobo nga may design nga heart ag mga stuffed toys.
Mas maabu man sigon ro nagabakae makaron ukon mga walk-in kumpara ko nagtaliwan nga dag-on rason nga mag-eowas sa mga ginabaligya sa pwesto hay may una man sanda online nga nagabaton it orders.
Kadungan it pagdagsa it mga bumaeakae hay naging mahinay man ro trapiko nga ginadumaeahan it mga kapulisan ag katapo it Kalibo Auxiliary Police .
Ginaeuman nga magadere-deretso raya bilog nga adlaw nga suno sa mga nagabaligya, dapat nga tempranuhan ro pagbakae bangud nga posibleng maubusan sanda it mga manami nga klase it bueak ag mas pa nga magataas ro presyo makaron nga adlaw .
