KALIBO, Aklan —- Puro naghalin sa lokal nga partidong Tibyog Akean ro mga nadaog nga kandidato sa provincial level sa probinsiya it Aklan sa katatapos nga 2022 national and local elections.
Daog sa haeos tanan nga banwa it Aklan mag-eowas sa banwa it Kalibo si Ibajay Mayor Jo-en Miraflores, unga it magaretiro eon sa pulitika nga si incumbent Governor Florencio Miraflores sa pagiging gobernador kontra sa hugut nga karibal nga si dating Kalibo Mayor William Lachica.
Maskin nga nagdihon it kandidatura ro bagito sa politikang si Engr. Willie Tolentino ag Rayam Torres, apang ro engkwentru sa nasambit nga posisyon hay sa tunga eamang nanday Miraflores ag Lachica.
Base sa KBP ag Bombo Radyo Quick count partial and unofficial result, humakot it landslide victory si Miraflores nga may una nga 196,390 votes, samtang si Lachica hay nakabo-oe it 111,833 nga boto.
Sa vice gubernatorial post, nagdaog ro reelectionist nga si Atty. Reynaldo Quimpo nga may 143,443 votes kontra kay Jonathan Cabrera nga nakabo-oe it 91,947 votes ag Atty. Nolly Sodusta nga may 59,642 nga boto.
Nagpangibabaw man si Carlito Marquez bilang kongresista sa unang distrito it Aklan para sa ikatlong termino nga may 89,271 votes kamana man si Ted Haresco sa ikaywang distrito nga nakabo-oe it 134,436 nga boto.
Base sa datos it Comelec, ro Aklan hay may 409,000 nga rehistradong botante ag 694 nga clustered precincts.
Ginahueat pa ro pormal nga pagproklama it provincial board of canvassers sa mga nagdaog sa katatapos nga eleksyon.
