KALIBO, Aklan — Daog man ukon piyerde hay todo suporta sa gihapon ro mga overseas Filipino workers (OFWs) sa pilang hampang it delegasyon it Pilipinas sa nagapadayun nga 33rd Southeast Asian (SEA) Games sa Thailand nga magatapos sa Disyembre 20.
Suno kay Bombo International News Correspondent Fernando Catane, maskin nga masako sa andang natungdan nga mga trabaho, ginatinguhaan nanda nga maagtunan kaibahan ro pilang kaparehong Pinoy ro mga venue it pahampang maskin pa nga ro iba sa mga raya hay ginapatigayon sa guwa eon it Bangkok.
Dugang pa kara nga nasayuran nana kon ano ka-importante ro bulig it mga Pinoy maskin nga behind-the-scenes para sa kada atletang naga-representar sa nasyon.
Sambilog sigon sa andang natan-aw hay ro hampang nga table tennis, kun sa siin, parehong ro men and women’s team hay nakasueod sa semi final round.
Bilib sigon imaw sa mga atletang Pilipino bangud sa andang fighting spirit ag maisog nga ginadaea ro bandera it Pilipinas sa Thailand maskin nga dehado sa cheers it mga nagatan-aw.
Ginpahayag pa ni Catane nga nagaeaum imaw nga mapabilin it Pilipinas ro ika-limang pwesto sa medal standing bangud nga maabu pang hampang nga pwedeng makahakot it bueawan nga medalya eabi eon sa muay thai, basketball ag iba pa.
