KALIBO, Aklan–Nagaeaum ro mga online seller nga indi pagpadayunon it META company nga may kontrol sa Facebook ro plano nga pagduea sa online selling sa Pilipinas.
Suno kay Kimberly Rublico, CEO ag owner it Kim’s closet nga nasubuan imaw kat mabatian ro balita bangud siguradong maapektuhan ro anang pangabuhian.
Bilang sangka online seller suno kana hay mabahoe ro bulig it live nga pagbaligya online para makahakot it maabu nga costumer ag makaangkon it maabu nga kita.
Sa live selling sigon hay hilway sanda nga ma-eksplikar ro kalidad it andang produkto ag makaangkon pa it inter-aksyon sa mga “miners” ag “viewers”.
Mas magaoy sigon ro magpatigayun it pictorial bangud kinahang-ean pa mag-edit sa litrato antes i-post.
Angot kara, nagpagguwa eon man it pagklaro ro META pinaagi sa sangka statement nga pwede gihapon nga makagamit it Facebook live kaeakip ro online selling sa Pilipinas.
