KALIBO, Aklan—Ginkalipay it mga pumueuyu ag barangay council ro uman nga pagpadayon sa pag aspalto sa national highway nga sakop it barangay Tabayon, Pagsanjan ag Venturanza sa banwa it Banga.
Suno kay Punong Barangay Rosellier Nalayog it Tabayon, Banga nga ginpasaeamatan nanda ro madasig nga aksyon it Department of Public Works and Highways ukon DPWH sa andang reklamo kontra sa International Builders Corporation ukon IBC, ro contractor it nasambit nga proyekto.
Madumduman nga ko nagtaliwan nga mga domingo hay maabu nga mga motorista ro nadisgrasya sa lugar matapos nga gin-aywan nga nakatewangwang ro mga ginsudsud nga aspalto nga owa it nagakaigo nga road signages bangud sa gina-alegar nga pagkueang it andang mga gamit.
Kabay suno kana nga magadere-deretso ro pagtrabaho agud nga matapos ro andang pag aspalto sa mas madali nga paniempo.
Kadungan kara, nagpanawagan man imaw sa mga motorista nga mag doble dahan eabi eon makaron nga sigidas ro pag-inuean ag madanlog ro daeanon.
