KALIBO, Aklan—Engkaso nga mapursige ro kaso, nagaaeaum si Kalibo sangguniang bayan member Agosto Tolentino nga magaserbing leksyon sa mga business establishments nga padayun nga ginabalewala ro mandatory benefits ag privileges it persons with disabilities ukon PWD’s kaibahan ro mga senior citizens sa pagbakae it mga raya.
Raya hay kasunod it reklamo nga ginpaabot it sangka PWD kontra sa sangka resto bar sa sueod it bisinidad it Kalibo international airport nga matapos nga magkaon hay owa gintaw-an it 20% discount maskin nga may ginpakita nga balido nga ID.
Bangud kara, nagdangop ro tagreklamo sa Persons with Disability Affairs Office ukon PDAO-Aklan nga insigida man nga gin-aksyunan it SB Kalibo nga nagpatigayon it special session.
Ginpahayag ni Tolentino nga base sa laye, magapangatubang sa reklamo ag penalidad ro sin-o man nga business establishments nga nagabalewala sa 20% discount para sa mga PWD’s ag mga lolo ag lola.
Posible man sigon nga pagatalakayon ro isyu it sangguniang panlalawigan.
Ginpahayag dugang nga hugut nga gina-monitor nanda kaibahan ro PDAO ro pagsunod it business establishments upang masiguro nga ro mandatory benefits nga nakataeana para sa mga PWD’s ag senior citizens hay maitau sa mga raya.
Samtang, nag apela man si Tolentino sa tanan nga mga business establishments nga i-adopt ro tamang sistema ukon ayuson ro andang mekanismo sa pagsunod sa RA 9442 ukon magna carta for disabled persons.
