KALIBO, Aklan — Bangud sa nabaton nga overwhelming nga suporta halin sa publiko ro sambilog sa mga naging rason it uman nga pagdaeagan sa pagka-mayor it Kalibo.
Raya ro ginpahayag ni dating Kalibo Mayor William Lachica sa interview it Bombo Kalibo.
Suno kana nga antes ro gintaeana nga petsa para sa pagdihon it certificate of candidacy (COC) hay maabu kana ro naga-engganyo nga uman nga magbalik sa anang dating pwesto nga medyu mabudlay nga balibaran.
Kumpiyansa man ro dating alkalde sa anang track record para sa posisyon.
Sa kamatuoran suno kana, sa haeos siyam nga dag-on nana nga pagpanerbisyo, maabu nga mga proyekto ro anang napatuman nga ginaeakipan it pagpatukod it mga tulay, kamana man ro naga-eksister makaron nga 3-storey new municipal building, evacuation centers, improvement it mga health centers ag maabu nga iba pa.
Sa pihak nga parte, ginapanan-aw sigon ni Lachica nga magiging manami ro andang pag-atubang sa maabot nga eleksyon ni incumbent Mayor Juris Sucro.
Samtang, maskin nga magmaeanghud hay may kanya-kanya sigon sanda nga pagpangabuhi ag desisyon it anang manghud nga si dating Kalibo Mayor Engr. Emerson Lachica nga nagapadaeagan makaron bilang konsehal sa idaeum it line-up it anang kaengkwentru nga si Sucro.
Ro importante sigon hay sambilog ro andang katuyuan, ro magserbisyo sa mga kalibonhon.
Maka-tandem ni Lachica ro negosyanteng si Ricardo Agravante sa maabot nga eleksyon nga ro target hay mapabaskog ro food security sa banwa it Kalibo.
