KALIBO, Aklan—Temporaryo nga ginkansela ro tanan nga klase it sea sports activities sa isla it Boracay makaron nga adlaw it Lunes bangud sa mabaskog nga humbak ag maeain nga paniempo daea it Bagyong Enteng.
Raya hay base sa ginpaguwa nga advisory it Philippine Coast Guard ukon PCG-Aklan nga pirmado it andang commander nga si Lt. Junior Grade John Laurence Banzuela.
Ro nasambit nga desisyon hay may hugut nga koordinasyon sa Boracay Water Sports Association ag lokal nga gobyerno it Malay.
Nagapabilin man ro biyahe it mga motorbanca patabok sa isla it Boracay.
Kaeabanan nga ginabawae it mga awtoridad ro pagpatigayon it mga water sports activities agud nga indi mabutang sa peligro ro kabuhi it mga turista sa isla.
Angot kara, ginpasiguro it PCG-Aklan nga insigidang magapaguwa it panibag-ong sea travel advisory nga magadepende sa weather condition.
