KALIBO, Aklan — Padayun nga naga-apela ro barangay council it Mantiguib, Makato sa National Irrigation Administration (NIA)-Aklan nga taw-an it nagakaigo nga aksyon ro problema it andang mga mangunguma angot sa kawad-an it tubi sa irigasyon.
Raya hay kasunod it kapas-eawan it NIA-Aklan nga matuman ro andang promisa nga paga-agtunan ro andang lugar agud nga mausisa ro kahimtangan it kaeanasan sa nasambit nga lugar.
Suno kay Punong Barangay Jose Rusia it Mantiguib, Makato nga masyado apektado eon ro andang kaeanasan bangud sa kakueangan it tubi halin sa irigasyon.
Nangawa sigon sanda kon ham-an nga owa eon ginasunod ro schedule it pagpatubi sa andang lugar nga kada Biyernes ag Sabado.
Haeos naga-gil-ang eon sigon ro andang kaeanasan rason nga apektado ro andang tanum nga paeay nga nagakinahangean it maabu nga tubi.
Ginpamalibaran man nana nga may problema sa andang farmers ukon irrigators association bangud nga nagakasugot man ro tanan pinaagi sa pagpatawag it regular nga meeting.
Haeos pareho sigon ro problema it mga mangunguma halin sa andang kaiping nga mga barangay.
