KALIBO, Aklan—Haum eon ro Malay Municipal Tourism Office sa pag-aeabutan it mga turista umpisa makaron nga adlaw it Biyernes hasta sa Labor Day sa Mayo 1 para sa Love Boracay 2024.
Suno kay Felix Delos Santos, Malay Municipal Tourism Officer nga activated eon ro andang municipal incident management team bilang pagpahaum sa mga gina-abangan nga labor day event sa isla .
Maskin suno kana ro mga hotels hay haum eon sa pagbaton it mga bisita kun sa siin naga-abot sa 80% ro andang hotel occupancy rate.
Dugang pa nga hugut nga seguridad ro igapatuman sa pagpanguna it kapulisan nga makaron pa eamang hay nakadeploy eon sa mga lugar nga kaeabanan nga buhos ro mga tawo partikular sa front beach.
Bukon it kapareho sa dating La Boracay, ro love boracay hay nakatutok sa pagtau it malasakit sa isla.
Madumduman nga ro Love Boracay hay gin umpisahan ko 2019 pinaagi sa sangka resolusyon it inter agency task force nga nagabaylo sa laboracay matapos nga mataeupangdan ro unsustainable tourism practices.
Mag-eowas sa waea-tuo nga music festival ag beach parties, magapatigayon man it clean-up drive sa idaeum it project pristine nga ginaeakipan it mga tourism stakeholders association and cooperatives .
Nagpadumdum ro opisyal nga dapat kon anuman ro polisiya sa isla hay sundon eabi eon ro pagpilak it basura agud nga makalikaw sa anuman nga saeabton.
Samtang, bangud nga 80% it mga aktibidad hay outdoor, ginkasugtanan sa ginpatigayon nga pueong nga pagasundon ro gintaeana nga health protocols kun sa siin pila sa mga event hay pagahiwaton it mas temprano agud nga masiguro ro kaeowasan it mga nagapasakop bangud sa mainit nga tiempo.
Kasunod it ginpabaskog nga sports tourism, may pagahiwaton nga international dragon boat festival nga pagapasakupan it kapin sa 53 nga mga teams halin sa 17 nga mga nasyon, international Frisbee, beach volleyball, beach tennis ag iba pa.
Mag-eowas sa isla it boracay, ginadayo man makaron ro Nabaoy river, ginakabig nga pinakamalimpyo nga suba sa mainland malay nga perfect para sa family and barkada bonding activities.
