KALIBO, Aklan—Ginpaidaeom eon sa home quarantine ro mga tawuhan it Bureau of Fire Protection (BFP) partikular ro nakadestino sa Ibajay, Tangalan ag mismong iya sa BFP-Aklan matapos nga direktang nakasalamuha it mga raya si Regional Director Sr. Supt. Roy Agoto ag iba pang staff it BFP region VI matapos nga nakaangkon it direktang contact kay Western Visayas patient 144 nga sangka 26-anyos nga babaye nga ko ulihi hay nasayuran nga positibo sa Covid-19.
Suno kay BFP Aklan Senior Fire Superintendent Nazrudyn Cablayan, ginmanduan nana ro anang mga tawuhan nga makipag-angot sa tagsa nanda ka barangay health emergency response team agud nga mamonitor ro andang kondisyon samtang ginahueat pa ro andang request nga maboe-an sanda tanan it swab sample.
Ginklaro kara nga uwa nanda direktang nakasalamuha ro pasyente kundi ro andang higher official eamang kaibahan ro iba pang staff nga nag station visit sa nasambit nga mga fire station.
Sa sueod it tatlong adlaw suno kana hay naging limitado ro andang operasyon agud nga taw-an it daean ro decontamination nga ginpatigayon sa natungdan nga mga fire station.
Apang, sa makaron hay balik eon raya sa normal ag ginpasiguro nga inde mawad-an it tawo 24/7 ro tagsa ka fire station agud nga makaresponde gilayon engkaso nga may mag-eontad nga sunog.
Nasayuran nga ro nasambit nga pasyente hay ginboe-an it swab sample ko June 5 kon sa siin ginpaidaeom imaw sa strict home quarantine hasta ko June 14 hay nagguwa ro anang confirmatory result nga nagpositibo imaw sa Covid-19.
