KALIBO, Aklan — Kadungan it uman nga pagbukas it Boracay sa publiko, bumuhos ro mga turista nga kaeabanan hay mga local tourist.
Si Tourism Secretary Bernadette Romulo-Puyat ro opisyal nga nagdeklara ko pagbukas it isla sa Cagban jetty port sa Barangay Manocmanoc.
Nauna eon kara nga gin-anunsyo it Department of Tourism (DoT) nga may kabilugang 157 ro mga hotels ag resorts eon ro gintaw-an it “go signal” it Boracay inter-agency task force nga pwedeng magbaton it mga bisita nga may katumbas nga 7,308 nga kwarto.
Pila sa mga highlights sa Boracay reopening ro unveiling it Boracay icon, nga matapos nga ipakita sa publiko hay gilayon nga gindumog it mga gustong mag-selfie kasunod it pagpabueo it litrato it mga opisyal it gobyerno nga nagtambong sa event.
Ro nasambitang icon nga nagapakita it bag-ong hitsura it Boracay ro unang magabungad sa mga turista sa pag-abot sa isla.
Nauna eon kara nga ginpahayag it Department of Environment and Natural Resources (DENR) nga sambilog raya sa magiging prominent marker sa Cagban port.
Samtang, nagpakitang gilas man sa Boracay reopening ro mga tumandok nga Ati, ginakabig nga mga sinaunang naga-istar sa isla pamaagi it andang pagsaot.
Ginbuksan man ro Circumferential Road sa Bolabog area, kon siin ginpangunahan nanday Tourism Secretary Puyat ag Department of Public Works and Highways (DPWH) Secretary Mark Villar ro ribbon-cutting.
Ginpasarado ro Boracay ko Abril 26 agud igapaidaeom sa an-om nga bueang paglimpyo ag rehabilitasyon matapos bansagan ni Pangueong Rodrigo Duterte nga cesspool ro isla.
