KALIBO, Aklan—Sigidas makaron ro monitoring it Municipal Task Force on Covid-19 kasunod it pagpositibo sa sakit it sangka locally stranded individual ukon LSI.
Suno kay Liga ng mga Barangay President Ronald Marte, ginsuhestyon nanda nga makaangkon it koordinasyon ro kada barangay agud nga mamonitor ro mga naga-ueoli nga LSI kamana man ro mga returning overseas Filipino workers.
Ginpahayag dugang nga uwa nagaduhong ro tagsa ka barangay health emergency response team ukon bherts sa pagmonitor sa andang mga nasakupan agud nga makalikaw sa pandemya.
Kat nagdueogsuan suno kana sa pag-uli ro mga LSI hay aminado sanda nga nabudlayan sa pagdumaea it mga raya bangud sa kakueangan it quarantine facility.
Ginsuhestyon sigon nanda sa lokal nga gobyerno it Kalibo nga makaangkon it dugang nga Ligtas Covid Center ukon LCC para mamonitor it husto ro kondisyon it mga LSI ag ROF’s.
Inde sigon pwede balibaran ro mga naga-ueoli nga LSI apang sa makaron hay temporaryo raya nga ginpapundo bangud sa kabaeaka it ibang LGU’s sa rehiyon partikular sa Iloilo, Bacolod ag Cebu matapos nga sigidas ro pagtinaas it kaso it Covid-19 sa andang banwa.
Nasayuran nga nakalista eon ro Aklan it kauna-unang LSI nga nagpositibo sa Covid-19 sa katawuhan it sangka 23 anyos nga babaye nga naghalin sa Cebu.
