(Update) KALIBO, Aklan—Nag-panic ro mga turistang Chinese kat hampakon it mabaskog nga hangin ag baeod ro ginasakyan nandang baroto rason nga raya hay nagkueob sa baybayong sakop it Sitio Diniwid, Barangay Balabag sa isla it Boracay.
Ginpahayag ni Senior Chief PT Officer Dominador Salbino it Philippine Coastguard (PCG) Caticlan sa interview it Bombo Radyo nga raya sigon ro nagguwa sa andang inisyal nga imbestigasyon nga ginkamatay it sambilog samtang tatlo ro naninahan nga puro mga Chinese nationals.
Ginklaro kara nga 28 katawo ro sakay it MB Jovelyn 1 nga ginakaeakipan it 23 Chinese nationals, daywang Filipino tour guide ag tatlong crew nga ginamanehar it boat captain nga si Jemir Fernando.
Kapin sa 200 meters eamang halin sa shoreline ro natabuan it insidente rason nga insigidang nataeopangdan ro pagpangayo it bulig it mga biktima.
Sa makaron hay padayon nga ginabueong sa Aklan Provincial Hospital ro tatlo samtang nagapahuway eon sa tagsa-tagsa nanda ka hotel ro 19 iba pang mga turista nga nakaeowas sa nasambitang insidente.
