KALIBO, Aklan—Nagakabaeaka makaron ro barangay council it Poblacion, Kalibo sa pagtaas it kaso it paeanakawan it motorsiklo.
Suno kay punong barangay Neil Candelario it Poblacion, Kalibo nga naka-istorya nana ro Kalibo municipal police station ag ginpasiguro nga ginpabaskog nanda makaron ro police visibility sa nagkaeain-eain nga lugar eabi eon sa dis-oras it gabi-i, kun sa siin dikara nga oras kaeabanan nga naga-atake ro mga manakaw.
Partikular sa mga baeay ilimnan ag iba pang mga establisimento komersiyal.
Nagpanawagan man si kapitan Neil sa mga pumueuyu nga maging mapagbantay sa andang palibot ag indi pagpabay-an ro andang mga motorsiklo.
Kaeabanan suno kana sa nabiktima it motornapping hay ro mga naaywan ro andang yabe sa saeakyan.
Nauna eon nga ginpahayag it highway patrol group ukon HPG-Aklan nga base sa andang pag-imbestiga, kaabuan sa mga kaso it motorcycle theft hay makabig nga pagpang-malit eamang it pilang indibidwal bangud nga matapos nga boe-on ag magamit hay gina-abandona sa pilang lugar.
