Padayun nga ginabantayan it Department of Health Western Visayas Center for Health Development ro posibleng naging epekto it nagtagas nga langis sa banwa it New WashingtoN.
Sangka team halin sa DOH Western Visayas pinaagi sa andang Health Emergency Management Staff ro nagpatigayon it rapid environmental assessment sa sueod it shipyard sa Barangay Polo sa nasambit nga banwa agud nga matumod ro naging epekto kara sa ikamayad nga eawas it mga pumueuyu.
Mag-eowas kara, nagpanupod man ro team it peak flow meter, Go bags, aquatabs water purification tablets, family health kits, latex gloves, water testing kits ag iba pa.
Ginpasiguro man it DOH, New Washington mayor Jessica Panambo ag Municipal Health Officer Dr. Daystar Sedillo nga nakabantay sanda ag haum nga magtau it anuman nga bulig sa nakaangkon it sakit nga epekto it oil spill.
Nauna eon nga naka-apekto sa mga residente nga ro nagapangunang pangabuhian hay ro pagpangisda ro nagtagas nga langis ko nagtaliwan nga Mayo 26 halin sa nakadungka nga barge nga gina-salvage ukon gina-chop-chop sa sueod it Metallica Shipyard.
Partikular nga naapektuhan kara hay ro District 1, 2 ag 3 it Pinamuk-an, Sitio Malogo, Lagatik, Riverside ag Kamingawan it Poblacion ag Sitio Kamangahan it Tambak.
Sa makaron hay kontrolado eon it Philippine Coast Guard ro nagtagas nga langis pinaagi sa pagbutang it spill booms kamana man ro andang ginapatighayon nga cleanup operations.
Bangud kara, ginduea eon ni Mayor Panambo ro pagsuspendi sa pagpangisda sa Lagatik River kasunod it assessment it Provincial Environment and Natural Resources Office.
Ginkumpirma man it Environmental Management Bureau – Region 6 nga balik eon sa eowas nga lebel ro water quality para sa anuman nga fishing activities sandig sa ginpaguwa nga Certificate of Analysis ko June 5.
